紅車厘麵包西餅

营业中

休息中

晌深水埗明星海鲜酒家跟屋企人食完团年饭，向地铁方向行，路经红车厘，门口饼柜之上堆满炸油角、牛耳，老婆话买两包返去应吓节，被我睇穿佢啦，都喺口痕想食啫。一晌都无乜人嚟小弟屋企拜年嘅，通常喺我哋去亲戚度，结果，买番嚟最后都喺我哋两公婆食鬼晒，哈哈。炸油角（角仔）$26虽然佢无写，小弟亦无问，不过拎起嚟几坠手，大概半磅左右。传统做法，都喺芝麻、花生、椰丝、砂糖做馅，馅料研磨细碎，味道浓香，而外层炸得酥脆，比起零食物语啲猪肉松角仔，都喺传统嘢有韵味啲。有个感觉，晌依啲面包铺头仔买角仔，会新鲜啲，因为铺后就喺工场，睇住销售情况嚟睇住做。其实整角仔喺小弟同姑妈、表哥表姊们嘅集体回忆嚟，廿几年前，仲住晌啲7层H形公屋，通常都喺自家制再派街坊，搓皮就未轮到我，不过包馅、收口、折边我都OK架，工多艺熟吖嘛，以前年年都喺咁整。依家？应该生晒锈啦！牛耳 $20另一怀旧小食，平时都真喺好少买，鬼叫依家咁多零食选择咩！红车厘嘅牛耳做得非常薄，所以咬落极香脆，又带点点南乳香。食得薯片多，转食吓牛耳都唔错，廿蚊一大包，买筒薯片都差唔多啦，份量仲边有咁多添，可以嘅话不妨支持吓依种传统小食，又支持吓啲旧区小店。