王牌冰室 (南豐紗廠) (已結業)

其实我地成日都会出荃湾，因为荃湾有好几个大商场，会有小朋友厕所，又会有好多其他育婴设施，啱哂我地呢啲有小朋友嘅家长。之前成日听朋友介绍，南丰纱厂有好多打卡靓位，咁𠮶日去开荃湾，我地就过咗去南丰纱厂到行下，顺便食埋个早少少晚饭。行下行下，就拣咗呢间「王牌冰室」啦！我地绝对系比佢个招牌同环境吸引咗入去㗎！而且「王牌冰室」隔离，连住间「 王牌冰茶」，都系佢地㗎！舖头入面仲有句「是是旦旦叉烧蛋饭」，所以我一嚟就拣咗个「虾仁叉烧炒滑蛋饭」，味道果然好，而且滑蛋真系好滑，饭底系豉油配香饭底，唔怕个饭冇味。再嚟一个清清地嘅「虫草花北菇蒸滑鸡」，啲鸡真系滑嘅，成个𩠌好香，仲热辣辣上枱。健康之人必叫菜，因为冇哂生菜，我地就叫咗「蒜蓉炒白菜仔」，好似一个好普通嘅菜，的确系，但热辣辣上枱，真系我都食唔停口。最后，食饱饱又点可以唔饮嘢，我系劲爱奶盖之人，所以就拣咗「王牌冰茶」嘅【焦脆奶盖 • 东方美人】，真系超好饮，奶盖加咗啲脆脆嘅焦点，配埋东方美人茶，真系绝配。总结：冰室嚟讲，有好多唔同类型嘅𩠌菜拣，有啲仲系「王牌冰室」独有嘅，记住，食完饭一定要叫返杯茶饮，咁就完美啦！