A-1 Bakery & Cafe (已結業)

之前睇过佢地嘅 Tea Menu，就谂住试下。原来个牌无写几时开始，问个职员佢话 1430。𠮶个职员好好人，到 1430 𠮶时佢提我点餐。咁我又真系等到 1430嘅。用埋之前入会送𠮶张现金卷。原来呢到都用传呼器，食物准备好就会亮灯和震。烟三文鱼沙律(一片烟三文鱼，可加柠檬汁，沙律菜尚算新鲜)，焗茄汁豆(无加热)，杏鲍菇(3片)，黑松露炒蛋(好香黑松露，炒蛋滑，不过劲油)，墨西哥辣椒芝士肠(辣辣地好惹味，切嘅时候中间有芝士必出嚟，仲有少少杂菜，见到细细粒西兰花嘅花)，卓灵亚肠(短𠮶条，咸咸地)，同迷你牛角酥(刚巧旁边面包店牛角包新鲜出炉香喷喷，不过我𠮶个谂咗，上面涂咗一层闪令令嘅糖浆)。跟餐饮热柠檬茶，柠檬都正常嘅，无啡皮。坐𠮶舖头入面都几舒服架，喺近门口开放式𠮶边走廊唔够冷气，比较焗。