意粉屋 (已結業)

平时出街同朋友成日都会食西餐，但同屋企人反而好少。今次衬住妈咪生日，一于带阿妈、阿爸嚟食好西（餐）！尖沙咀够就脚方便，难得嘅系无几可食西餐嘅两老都听过意粉屋，就拣来呢度食啦😆原本book咗枱七点钟，点知因为落雨搞到迟左半个钟，一心以为来到要重新等位，点知Waitress话张枱仲留咗俾我哋，仲系玻璃窗位置，可以睇到街景，太贴心啦！好啦，坐定定，可以嗌嘢食啦。前菜我哋叫咗哈密瓜风干火腿伴意大利黑醋，风干火腿就咁食会偏咸，但火腿配埋哈密瓜就会变成绝配，呢种化学作用真系好神奇！主菜我哋叫咗3样，第一个系芝士卡邦拿意大利粉，一嚟到已经见到个酱汁好creamy，waiter仲即场系一旧大芝士度刮芝士碎落去，一啲都唔吝啬，个意粉嘅芝士味真系好香浓。另一个系芝士焗海鲜墨鱼汁意大利饭，呢个嘅精髓都系喺个汁度，有一阵好独特嘅咸香味，阿爸特别欣赏😆最后就换下味，叫咗个烟肉大啡菇黑松露酱薄饼。平时嘅pizza配料来来去去果几样，见到呢一个系黑松露酱咁特别，所以想试吓。个pizza够薄身，好似食紧饼干咁，黑松露酱又好香，呢个Pizza值得一试。总括来讲，好少食西餐嘅两老都觉得好满意，负责埋单嘅我都觉得抵晒😂