嘉道理農場素食亭 (已結業)

参观嘉道理农场，行吓行吓想饮杯热啡，睇地图发现有食肆就过去睇睇。食肆好似平时公园入面的小食亭咁，外面放咗几张有太阳伞的大木枱同长木櫈，周围有青BB 的植物，感觉似坐喺郊外野餐，部份用餐位置近马路，间中传嚟风驰电掣的飞车声。饮品以外，有卖意粉、三文治、沙律，有机菜式究竟有唔有机，信就有，不信则无。难得嚟到，即管叫个有机豆渣蔬菜汉堡试吓，店员讲明要等 15 分钟。等食期间周围望，留意到小店系由精神病康复者打理。帮衬等同支持佢地就业，有意思㖞。咁单凭食物质素，值唔值得支持呢？汉堡卖相靓靓，攞上手够热，手感好；菜，冇啡边，揈得够干身。咬一啖，估唔到用咗香草包，包包仲烘咗底，好香。菜咬落清脆，番茄有肉汁，食得到的新鲜；豆渣汉堡扒入口唔会散收收，味淡就预咗，配埋香草包、蔬菜同酱汁一齐食，个味好夹㖞。好彩冇贪食叫多个松饼，食晒个包已觉饱。好想知小店用的蔬果同鸡蛋，喺咪来自嘉道理农场呢？呢度点餐、取餐系全自助，食完嘢，将餐具攞返去柜枱交俾职员，咪误会去咗餐厅噃。