豆漿大王

营业中

休息中

之前跳舞间唔中都会黎豆浆大王食晚饭，佢地嘅豆浆、粢饭系招牌菜，今次食一定要食翻个粢饭，仲要叫左多肉松，叫左个上海小笼包，但因为系好新鲜，要即刻蒸嘅，所以要等15分钟左右，（太肚饿所以食左一个先记得影相，其实有四件的）之后我地叫左个酸辣面，有少少辣，唔知点解有好大阵泰式辣酱味，不过都好味嘅，之后仲叫左个酥炸鸡翼，一碟有四只，炸粉较薄，但略为咸左啲，不过我地饱到都食唔晒，最后压轴介绍嘅系咸豆浆，好好饮架，仲好饮过普通豆浆，佢入面加左葱花、虾米同埋好多块油炸鬼，超好饮，不过我地最后都有再叫多个冻豆浆，食得太多咸野，要解下渴。虽然食物整体都好好味，但餐厅环境就略为污糟，座位都比较逼夹，如果介意就真系要考虑一下外卖，因为依个系late lunch，所以系下午茶餐时段，非常抵食，埋单先至系$117，整体而言十分推介。