伊賀日本燒肉料理 (已結業)

打风前嘅晚上，尖沙咀依旧人来人往。嚟到专门食日式烧嘅伊贺，完全感到放假前嘅兴奋感到。呢度点菜单模式非常先进，唔系依赖传统嘅纸笔落单，而系iPad 图文并茂，一次过睇晒有咩想食，方便快捷。首先嚟到嘅日式刺身，三文鱼鱼油甚香，甜虾鲜甜美味，而八爪鱼爽口弹牙，系相当新鲜嘅选材。接著当然系肉食时间，提供嘅选择非常之多，和牛粒系爱牛之人必点，牛肉虽然厚身，但嫩口非常；牛肩肉食得出带有较爽劲嘅口感，唔需要多点调味，都食得出肉质鲜美嘅感觉；而火辣鸡翼亦特别推介，辣味好入味，但又唔会辣都不能入口，够晒过隐。烧海鲜主要用小碟承载住，方便控制温度，烧大概15分钟，蛏子，大蚬等等都熟透，而香草鱼柳就更加快，10分钟左右就食到香草味浓郁嘅鱼柳喇！接著嘅炸物亦无令到我地失望，全部都即叫即炸，食落好香口。天妇罗脆浆够薄，先食得出食材真正嘅味道。最吸引嘅系榴莲炸弹，同炸绿茶雪糕，唔系间间餐厅都供应，一定要试。而寿司嘅款式亦都唔少，由火炙三文鱼，到玻璃虾寿司都一应供应，真系唔怕食唔饱。最后仲有贵价Movenpick雪糕，同埋任饮汽水，中意任食同款式多嘅，必然首选呢间。