福丸水產 鉄板燒 日本料理 (已結業)

由于收工太夜，周围睇下有边间餐厅仲未收舖。见到荃湾嘅福丸水产有宵夜时段，我哋就9点后入座。餐牌图文并茂，食物图片非常吸引。每次食日本野都必食牡丹虾寿司，呢度嘅牡丹虾非常大只新鲜，味道鲜甜，配埋饭加wasabi 豉油一齐食，好美味。牛油果软壳蟹卷一共有六件，每一件都放左三片牛油果在上面，配以卷物入面嘅软壳蟹卷，软壳蟹炸得好香口，非常滋味。帆立贝天妇罗，好少系居酒屋食到天妇罗版本。帆立贝好大只，外脆内软，再配埋小小海盐一齐食，好Juicy。松叶蟹脚天妇罗🍤好大条，同样滋味。火炙左口鱼寿司中，左口鱼烧到好香，食落去好Creamy。海鲜炒饭好大碟，骤眼睇配料相当充足，有鳗鱼、虾、葱花同埋多款海鲜等，炒得好有镬气，食得出系用日本珍珠米炒成的。炸白饭鱼饼炸到金黄色，再配少少粟米，咬落去脆卜卜之余，白饭鱼嘅份量都非常多，再配少少海盐吊下味，正。除此之外，仲order左海胆寿司、火炙三文鱼、黄金蟹膏、松叶蟹膏甲罗烧、吞拿鱼腩寿司同埋椰子雪葩，为呢一餐丰盛嘅日本菜画上句号。