影片
更多
2011-02-08
29 浏览
闻名已久，终可一试，本来系补祝太太生日嘅，临时拉多一对夫妇朋友，高庆啲之余，咁就可试多啲嘢。虽然佢系间德国餐厅，但除咗一系列冻柜卖德国肠、德国食品，以及一啲蛋糕之外，唯一令人觉得佢系间德国餐厅就系中间嘅巨型啤酒桶，唔系装饰，真系用嚟斟啤酒，此外，环境格局同一般西餐厅唔系太大分别，深色木凳木枱，未算太有欧洲气息。今晚系星期五晚，坐满人，都几逼夹架。虽然，环境唔觉系酒店嘅星级，但佢哋嘅服务绝对系酒店级质素，除咗斟茶递水基本招呼礼貌做足之外，点菜时对餐牌唔明，有问必答，唔会盲摸摸话唔识，最难忘系上菜时一次过，餐汤一次过上晒，主菜亦系一次过一齐上晒，唔会逐个逐个嚟，而且，饮完汤上主菜，间隔个时间都OK，唔会汤未饮完就嚟主菜，亦无话饮完汤迟迟未见主菜到，依啲细心位都值得加分！晚餐包餐汤、主菜、自选蛋糕或沙律、餐饮，价钱$188 / $228（视乎拣咩主菜）。因为晚餐得两款主菜拣，所以我哋除了叫咗两个晚餐，试齐两款主菜，另外加多两个餐汤同两个主菜，晚餐嘅蛋糕就一齐分享，好彩朋友以前都嚟过食，一早教路预留蛋糕先，虽然佢个饼柜都有成十多款，但系每款得𠮶几件，唔预留就可能食唔到心水嘅蛋糕！另外，晌报纸剪
晚餐包餐汤、主菜、自选蛋糕或沙律、餐饮，价钱$188 / $228（视乎拣咩主菜）。因为晚餐得两款主菜拣，所以我哋除了叫咗两个晚餐，试齐两款主菜，另外加多两个餐汤同两个主菜，晚餐嘅蛋糕就一齐分享，好彩朋友以前都嚟过食，一早教路预留蛋糕先，虽然佢个饼柜都有成十多款，但系每款得𠮶几件，唔预留就可能食唔到心水嘅蛋糕！另外，晌报纸剪咗75折优惠券，埋单$700多少少，食得好饱好满足，事后仲觉得除两个晚餐外，额外叫多一个主菜就够晒添！
面包篮点好餐后，侍应手拿一大方篮面包走过嚟，无细望，印象中应该有5款，全系欧陆面包，其实心里就想试晒，不过如果系咁就食包饱，唔使再食其他嘢喇，之但系我都拣咗其中3款：核桃、芝麻幼麦同罂粟籽，三款质感都好唔同，核桃最粗嚡，但麦味较香；芝麻幼麦质感就细致啲，面包皮就烟韧啲；而罂粟籽包身柔软，其实啲罂粟籽本身无乜味，只系令个包有趣啲同有脆啲！
餐汤晚餐餐汤系指定嘅Minestrone，即系意大利杂菜汤，材料几丰富，有甘笋、洋葱 、西芹…等，色泽深红，味道浓郁，绝对真材实料。
散叫嘅有马铃薯汤伴德式面包粒 $58，属忌廉汤一种，汤里放有面包粒，而汤打得好幼滑，最重要系劲重薯仔味，汤不可貌相，的确唔错。
仲有一个散叫汤，白菌忌廉汤 $58，个名超普通，但唔好攞茶餐厅嘅白汤嚟同佢比，蚊脾牛脾无得比，除咗见到成个汤都系碎粒粒嘅磨菇外，个汤嘅磨菇味一样咁浓，咁先叫得上白菌汤。茶餐厅𠮶啲系鸡汤加「面捞」，再放几片磨菇，系白菌 + 忌廉汤啫！
主菜方面，晚餐可拣嘅有扒芝士肠配薯蓉及酸椰菜 $188同香煎三文鱼柳配橄榄油醋汁伴扁意粉及炒什菜 $228，另外再散叫咗嘅有德国咸猪手伴酸椰菜薯仔 $168同巴伐利亚式煮牛仔肠 $138。扒芝士肠配薯蓉及酸椰菜
芝士肠共两条，每条约五至六吋长，垫有酸椰菜，伴一大份薯蓉，德国豪迈不羁型格，唔会话将啲薯蓉唧靓啲上碟，就咁一Pat就系一Pat。芝士肠煎得香脆，切开确有几多芝士流出嚟，可以伴芥末食；薯蓉我哋分开四份后，每份都依然唔少，唔系得一啖半啖咁，薯蓉做得几滑，带少少牛油香味。
香煎三文鱼柳配橄榄油醋汁伴扁意粉及炒什菜三文鱼约比一只手掌大啲，做法简单，煎香后伴上橄榄同油醋汁，而扁意粉以橄榄油同香草轻炒过，再加啲炒甘笋、翠玉瓜同边豆。三文鱼都算油润甘香，扁意粉亦煮得啱啱好，属不错之作！
德国咸猪手伴酸椰菜薯仔咸猪手可以拣烧或者烚，圆形铁板上，垫咗好多酸椰菜晌底，加多一个烚薯仔，一开四，卖相绝对系粗疏。烧嘅都试过好几次，所以今次改食烚嘅，食其原味。感觉唔算太咸，几适中，外皮虽然无咗卜卜脆嘅感觉，但咬落啜啜哋口又几有趣，而且又无想像中咁肥，伴住酸椰菜嚟食，感觉仲好；肉质方面，亦已经煮腍晒，松软有肉味。
巴伐利亚式煮牛仔肠同样以圆形铁板上枱，两条大牛仔肠，加一个手掌大细嘅咸面包圈，伴以蜜糖芥末汁，卖相同样「求其」，贯彻德国嘢食嘅风格，但味道唔错。据朋友讲系德国最南部嘅做法，以牛仔肉造成，脂肪较少，无一般猪肉肠咁油腻，而肉香带咸，咸中又带有香草味，配住啲蜜糖芥茉汁同食，非常滋味。如果对依个牛仔肠有兴趣，不妨晌冻柜买一包走，都系两条装一包，好似四、五十左右，比起堂食平成半有多啦！至于个面包圈，德国传统送啤酒食品，以麦粉炮制，咬起嚟十分韧净，带咸，有趣但唔觉好食！
以上几款主菜，都系用咗薯蓉、烚薯仔、咸面包圈做伴菜，都系饱肚嘢，加上之前面包篮嘅自由选择，所以，真系三个主菜都够我哋四个人食丫。甜品
我哋无要杂果沙律，两个晚餐都系拣自选蛋糕，分别要咗松露朱古力蛋糕同苹果卷伴云喱拿酱。
松露朱古力蛋糕，高质素，因为无论朱古力蛋糕层，抑或松露朱古力馅层，都够香浓，又唔算太甜腻，而且，松露朱古力馅层亦做得柔软可口。
苹果卷，用酥皮卷住苹果肉、提子干，再以玉桂调味，焗好后冻食。苹果好甜，而且果肉切得比较幼细，朕朕玉桂香，配衬埋杯新鲜即磨咖啡，叹住食件个甜品，确系几正。可惜，个云喱拿酱虽然用原条云喱拿做，但个酱「杰」到好似炼奶咁㖞。
几个人倾吓倾吓都成10点，讲吓工作，讲吓楼市，开开心心咁就渡过咗几个钟喇！张贴
