天奴豬扒餐廳 (已結業)

试完「成记茶寮」同「开心小叙」，第三间就系「天奴」！呢到既猪扒主打系用人手逐块搥松，之后再用香茅同其他调味料调味再煎，令我都几期待，睇下会唔会媲美到「成记」先！餐厅外面内部同样系茶记，有外面有里面，相比起另外两间坐位就少左啲，好彩当日外面仲有位就住左系出面。食物选择呢到就真系唔系只有猪扒，「开心小叙」都有一张MENU专食猪扒，但呢到冇，同普通茶餐厅一样，以猪扒做主角既款式唔会特别多，都系正常茶记款式。香茅猪扒蛋饭  $51可以拣跟饭/薯菜/意粉/沙律，而酱汁方面系最多选择既一间，有成7种，分别系粟米汁、蒜茸汁、洋葱汁、黑椒汁、咖哩汁、鲜茄汁、豉油汁。同样地都系拣返豉油汁，呢到同其他两间有个最大既分别就系呢到有一条长矮瓜，可能系因为想碟饭有啲菜既关系而加入去，不过对猪扒饭黎讲，我就觉得有啲格格不入，我会宁愿无左条矮瓜收返平少少个价。讲返味道，猪扒都系属于厚身，有香茅味，仲会见到有啲辣油浆住左系猪扒面，食落有微微辣油香但又唔辣，松软度够，不过冇乜肥膏，加上豉油汁又系太少，同埋价钱稍贵，相比之下，供然系「成记」胜出～总括黎讲，呢间既猪扒厚度、口感其实同「成记」相约，不过成记更松化同带多啲肥膏