Eggspectation (已結業)

好耐之前成日喺杂志、电视见到呢间新派鸡蛋仔嘅介绍，一直都好想试。每次偶尔经过呢度，佢都冇开舖，仲怀疑佢执咗。𠮶个周末去探朋友，终于撞到佢开门喇。我其实食完晏无耐，嘻嘻～试新野㖞，始终都有多个胃嘅。睇到墙上贴住嘅选择……哗！款款都好似好好味，我嘅选择困难症发作喇。最后见到呢一个poster ,就佢啦，拣咗柠姜味。佢哋系即叫即整，等左一阵终于有得食啦！个包装都几吸引，系一个通窿嘅硬纸盒。鸡蛋仔每粒嘅size比传统嘅细啲，介乎五毫至一蚊银啦。外层够热，但唔算劲脆。正如佢哋铺头所讲只系加牛奶唔加水，食落又真系多咗牛奶香味。每粒鸡蛋仔入边都有一小粒柠汁姜，姜唔系好辣，少少甜，少少咸。口味都几过瘾。呢个鸡蛋仔实在好啱贪新鲜嘅人，可惜我未能忘旧。如果只系俾我二拣一，我都系会挂住某啲屋邨入边嘅炭烧鸡蛋仔多d。咁样比较可能未必好公平，始终呢度嘅口味既创新又独特。老板敢于开拓新口味嘅勇气值得一赞嘅！间铺头外面仲放左一张小圆枱同两张櫈。原来佢哋唔单只有鸡蛋仔卖，仲有英式早餐、汉堡包餐等等。价钱算ok,$50-60问咗佢哋开舖时间，系每日晏昼两点半至晚上大概七点。逢礼拜五休息架，下次我唔会再摸门钉。