和歌山 (已結業)

周日约咗姨妈们去太古城湿平，中午由湾仔出发前，大家决定先喺金钟地鐡站附近医肚。因时间比较紧迫，所以就求其拣咗间唔洗等位o既「和歌山日本料理」。午市时份，计埋我地在内，全店都只系得六个客人 ，细小o既店舖感觉好清闲。入座后，店员先送上热茶及餐牌。四人合共叫咗三碗拉面同一客炸鸡黎分。落好单后，可见身处于玻璃窗后o既师傅仔迅即开始烹煮食物。 一本猪软骨拉面（$138）：猪软骨拉面汤底清甜，拉面烟烟韧韧，猪软骨软腍脆口，虽然系好唔错，不过$138碗一啲都唔平 ！ 蒜香和牛拉面（$168）：因有大量葱蒜调味，和牛拉面个汤底味道更为香浓，碗入面所谓o既和牛食落反而劲似本地牛肉，实难同我地刚刚喺日本富良野食过𠮶啲比 。 炸鸡配自加制柚子醋（$78）：炸鸡外皮干身，但未够脆口，鸡肉则多汁且唔嚡口，份量都好足，加上有沙律垫底，又用上柚子醋调味，酸酸甜甜，一啲都唔觉溜 。位于湾仔及金钟交界o既「和歌山日本料理」，午市单点拉面，好味就好味，不过质素未能说服细佬要俾成两旧水去食啰！