博多拉麵別天神 (已結業)

呢排天气好热好焗，都冇咩胃口食饭。食返碗拉面，简简单单做晚餐就最好不过。别天神喺香港唔同地区都有分店，今次就试吓喺旺角山东街呢一间。一直都好欣赏呢度坚持贵精不贵多，只有两款拉面选择。首先有豚骨拉面。豚骨汤系经过百分之百嘅豚骨再加纯水用压力煲熬制而成，完全冇味精都好浓猪骨味。配料好简单，有好嫩既半熟蛋，半肥瘦叉烧，葱粒同埋木耳丝，冇太多花巧嘅嘢仍然好味。令一款面系虾味增豚骨拉面。本身嘅豚骨汤再加上味增同埋大量脆脆嘅樱花虾，成功再添增鲜味。而呢款拉面嘅配料冇用到木耳，转成粟米，粟米嘅清甜亦可配合更浓嘅汤底。呢度嘅面用上幼面，好易入口。如果系重口味人士，想再食得浓味啲嘅话，可以加枱面呢一支特制拉面汁，其实系用猪柳熬制既酱油，加几滴可以更加提升成个面嘅味道！再想重口味啲，可以加埋蒜蓉，腌萝卜，拉面胡椒，芝麻等等嘅配料。除咗拉面之外，呢度都可以加配两款小食，分别系小龙虾蟹子沙律同埋煎饺子。沙律由好多弹牙嘅龙虾肉同埋蟹子组成，放上紫菜到夹住一齐食，又几好食㖞。饺子一碟有四只，个皮够薄而且师傅都煎到个底好香脆，加埋少少醋汁一齐食，饱哂。