組長日式放題 (已結業)

近排特别多人约食放题，可能因为谂食咩太困难。食得密自然要拣啲低价位放题。今次嘅组长好易去，一出站就系。未新年就开赌？去到先知呢排每两个人去食就可以摇鱼虾蟹3次，两粒相同就有奖，但你几好手气都好，只可以三份礼物拣一份。最劲嘅铜钱围骰大派一千现金，promotion period咁长都唔系冇人中架！拎上手粒骰真系冇做假。我头2次都落空，第三次终于成功，换到支清酒，仲可以拎走添。坐低即刻送火锅，汤底味道唔错。我哋仲加咗钱，可以叫极上menu。每一样都好有水准。我哋每人食咗十几只珍宝带子，三四只蟹脚。极上menu质素明显高几班，所以我觉得加咗钱反而帮到我回本。普通menu嘅话牛肉类比较好食，牛味几浓又唔会过老。热食水准比较稳定，唯独系天妇罗类调味唔够。要注意嘅系用份计嘅款都比较大碟，要量力而为。最后赞赞呢度嘅服务，上菜快，唔漏单。而且都几细心，换碟时机啱啱好，有几次想搬火锅炉头/碟侍应都主动帮手。