華豐燒臘專家 (已搬遷) 新店位置

公司開年，有大人物來吃，當然要買點燒肉。已吩咐同事去買，講足要求，差d唔使要佢用3G比我睇過至買咁清楚，但買回來卻完全不是那回事。看來買燒肉還是要親自出馬，上去走一轉。行勻金龍、金華沙彌篤就多，沒有燒腩，先滋先覺又未開，好在呢度有半邊豬未開，拍一拍還微暖的，就拿拿林叫斬幾條骨來。肉質雪白及有肉汁，是新鮮豬，屬燒腩部份，當然是皮脆肉滑，間著一層肥肉，更美味。燒腩60蚊一斤，四條骨，兩斤幾，要128蚊，屬中等價錢。題外話：好多人不明白，以為去食碟燒肉飯吃的燒肉不好吃就呱呱叫。試問廿幾蚊一碟燒肉飯，人家會不會斬六十蚊一斤的燒腩給你？有都係三十蚊一斤的沙彌篤或隔夜燒腩骨，要吃好的，去斬條骨，一吃便知。