威威美食 (已結業)

自问系汉堡包迷，连续两日午餐食汉堡包。食返屯门略有名气嘅威威，第一次试就点咗手打牛肉汉堡，加芝士，配蜜糖芥末酱。加配菜价钱都唔贵，蘑菇都只系一律加$4。外卖真系要值得大赞，十分贴心！包装纸已经贴咗呢个系咩包，就算好似我地几个人食都唔会搞错。汉堡包用个盒仔装住，唔似连锁店咁包到有倒汗水整到个包淋晒。味道方面，先小人一下，面包类型唔系最岩我口味，感觉太厚身同有啲硬。其他方面都好好。面包有落牛油烘过。老实讲加咗蜜糖芥末酱食咩面包都好味。牛肉厚得黎煎得刚刚好，咬落仲有肉汁。$32嘅汉堡包绝对唔马虎，仲有蕃茄同埋生菜。下次再食豪啲，加埋蘑菇同埋蛋就锦上添花。