韓宮 (已結業)

自從黃埔站通車後，黎黃埔行街真係方便左好多，今日行完街後突然間想食韓國野，但又唔想食炸雞，所以揀左黎韓宮。呢度交通非常方便，地鐵站一出就到，就算天氣熱辣辣都唔駛驚啦。三個人叫左兩個主食同一份小食，份量唔太多可以留肚食糖水。落單無耐店員就先送上前菜，泡菜醃得非常香，肚餓既我地話咁快就清晒。泡菜辣湯 :上檯時仲滾架，飲一啖湯發覺都相當辣，但撈埋飯後味道一流，辣辣地相當開胃。石鍋雞肉飯 :除左雞肉外，配菜仲有紅蘿蔔絲，紫菜，芽菜同菠菜，再加上半熟既蛋，撈完後非常香口，韓式辣醬係分開上的，咁客人鍾意食幾辣就加幾多，食到最後石鍋底有少量飯焦，脆脆地又唔會太燶。煎餃子 :一份有八隻，餃子皮夠薄兼煎得香脆，肉餡汁夠多，唔會好乾，個人認為唔駛點汁就已經好好味。當食緊飯既時候，覺得越食越熱，想叫店員開大d冷氣，但店員話冷氣壞左，咁諗住快快食完走啦。但轉頭店員就同我地講唔好意思之餘，兼送上冰茶一杯，仲幫我地調校風扇角度，服務值得一讚。呢度食物同服務都相當好，地點又就腳，下次如果黎黃埔可以再試下其他野。