URA Japanese Delicacy (已結業)

见到呢座新大厦一段时间，成日话要嚟试新餐厅，终于成事啦！昨日打嚟订位话得番bar枱，无所谓啦照book, 不过今日嚟到又有其他位坐㖞，而且餐厅都唔full, 相信walk in 都不是问题。价钱由$98-$248，同事本想叫海解刺身丼，但系店员话已经卖晒！一点钟已经卖晒？咁到底我要几点嚟食lunch先会有呢？系限量供应还是真系咁多人order呢个餐？ 最终我哋分别叫咗鹿儿岛黑毛猪同炭烧宫崎牛。首先会有前菜沙律同蒸蛋，沙律细细碗，芝麻汁唔太浓。蒸蛋就比较水咗d，比例水多过蛋。 好快就上主菜啦！见到好似好多花样咁㖞，估唔到会有埋卷物同甜蛋。卷物系炸咗嘅吞拿鱼，鱼味突出。甜蛋调味刚好！黑毛猪就比较油咗d，油多过肉，肉质亦唔算松软。另有碗一口食得晒嘅豆腐脑，质地好得意，似系自家制嘅豆腐。 面豉汤就几贴心，葱花系分开嘅，唔食葱嘅朋友唔驶再夹夹夹啦⋯⋯ 同事嘅炭烧宫崎牛，味道一般同略为甜咗d，点埋佢比嘅汁就会太咸！同事食食吓话系古惑的饭呀！原来饭底垫咗菜！其实应该唔系想欺骗客人嘅，我估佢哋系将垫肉嘅菜放埋入去啫，用大d嘅碗，相信饭量无减少。