老馮茶居 (大棠路)

呢间元朗人气点心小店，食物出色，装修有特色，卖点系老香港情怀，假日闲闲地要等个半钟至两个钟。今次闲日下午2点去到，念住过咗繁忙时间唔使等咁耐，但都等咗35分钟。不过据闻茶居会扩充，攞埋隔离铺位，10月尾装修完，希望到时等位唔使咁耐。一般茶楼饮传统中式茶，但呢度可以叫奶茶、柠檬茶，我哋拣咗中式茶。我哋3个人有细路，点咗5个点心。*****炸云吞细路钟意食，每次嚟老冯都必点，炸得好脆，虾好大只，爽脆滑嫩，正！****叉烧肠皮薄馅靓，肠粉滑捋捋，叉烧好重料，肠粉身形肥嘟嘟，咬落去好有满足感。****牛柏叶好入味，好爽口，冇其他豆卜、萝卜配料垫底，成碟都系牛柏叶，诚意又老实。**烧卖正正常常，唔算有惊喜。***鱿香肉饼饭即叫即蒸，等咗25分钟先上，饭加咗猪油，好香，好味！但唔记得影相。😅因为赶时间，肉饼饭食唔晒，要打包。提醒一下，打包点心盒size好细，1蚊1个，如果念住打包，可能要用几个盒。建议自带餐盒，支持环保。