扒王一哥 (已結業)

听人讲呢间扒王一哥系以前扒王之王开既，于是乎同朋友一齐去试下，睇下揾唔揾到儿时食扒王之王既回忆。入到去餐厅灯光昏暗，枱同格之间唔会好逼，感觉都几舒服。见番之前系沙田扒王之王好有中气果位呀叔做伙计，声线中气十足简直系扒王signature ❗️整体嚟讲，以旺角地段，呢个价钱，食物质素唔差。百几蚊锯个扒，揾到个回忆过下瘾之余，重点系食物都好食嘅。餐汤好香牛油味，忌廉味浓厚。惹味爽口牛脷粒$35，以35蚊份量去睇，物有所值，但口感唔系爽口，反而系肉质系腍，易入口几好食。法国田螺$58，蒜蓉牛油薯蓉垫系田螺底，好香蒜油味，但薯蓉味道有少少过咸。美国顶级安格斯西冷牛扒$138，西冷肉厚，大块，肉质有咬口但唔系韧，食得出有肉味。美国黑毛猪扒$138，有啲失望，猪扒细块又唔够厚，但胜在肉质唔鞋口，都松软。