大尾篤燒烤王 (已結業)

星期日去大尾督踏單車兼燒烤。十幾個人其實冇乜選擇，度散叫梗係貴過套餐，而12人套餐只得兩款，一個係優惠套餐$688，另一個係富豪套餐$1,300。我唔係富豪，所以no choice之下叫優惠套餐，有雞中翼3磅、豬排2磅、牛排磅半、魷魚1磅、多春魚、腸仔、丸、粟米同番薯(各6隻)等，飲品就包12罐汽水(唔准自己帶飲)。佢一個膠盤裝哂食物，睇落好似幾少，開頭重驚唔夠食，不過結果剛剛好(如果我唔踏單車，重有大把時間繼續慢慢燒，又或者我係全男班，咁就唔夠喇)。另外，食物算有質素，醃得幾好味，而且豬排肉質唔錯，咬落去唔係鞋什什、乾爭爭。照計六百幾蚊夠十幾人食都唔錯呀，不過得12罐汽水又點可能夠，你買水，我又買啤酒汽水，都唔知結果平均一個人spend幾多，佢賺酒水賺到笑。