東海堂 (已結業)

士多啤梨控！东海堂每年都出好多唔同水果做主题嘅甜品，每年我最期待，亦较少令我失望嘅就系士多啤梨系列喇。最抢眼嘅当然系鲜红色初熟嘅日本士多啤梨啦，大粒就讲唔上但系的确熟嘅程度刚刚好，带点鲜甜，而且口感比较爽滑，呢二十零蚊好大程度比得心甘情愿都系因为佢😂鲜忌廉唔算太甜，而下面粉红色嘅就系士多啤梨味道嘅慕斯，香味强过甜味，所以我非常钟意，下边白色嘅蛋糕过得去都系松软嘅，但就冇乜蛋嘅香味啦，不过呢样嘢见仁见智亦都有人系比较钟意蛋白嘅味道嘅，中间红色，正方形状嘅就系士多啤梨味嘅啫哩，QQ嘅口感，喺软滑之间有中和嘅作用，咬落去一啖过就已经有几种唔同嘅口感，都几满意。至于紫薯味我觉得可以用原汁原味嚟形容佢，因为啲紫薯蓉真系冇加任何糖，食得出成个质感好原始，蓉好creamy，卖相相对逊色一啲，但系唔钟意水果味或者唔钟意太甜嘅人，亦都系另一个好嘅选择。一句讲晒，我偏心钟意士多啤梨。😂🍓