金不換泰國餐廳 (已結業)

拣午餐，十五十六，瞄到隔离枱个原只菠萝炒饭，即时有决定。理智警告系咪用「环保菠萝」，唔理咁多，呢一刻真系好想食。配料有虾、鲜鱿、鱼肉蟹柳、提子干、菠萝、杂菜、腊肠粒，置顶的猪肉松份量唔多，但令个饭变得可爱，亦丰富咗味道。饭够热，饭粒分明，上色均匀，调味刚好。虾肠已被剔走，赞！腊肠配菠萝好夹，个饭食落清新多过油腻，自己食晒碟饭都冇肥咗几磅的内疚。虾、鲜鱿呢两种食材，同时出现喺湿炒海鲜河，另有甘笋、草菰、大量芥兰、鱼柳同超多汁，好彩个汁唔系好咸。河粉唔系炒牛河咁一条条，反而系一旧旧咁垫底。粉，真系唔多，不过食埋啲𩠌系够饱。餐饮泰式热奶茶够香浓，有泰式奶茶的特别回香，唔使自己落糖都够甜。饭脚叫咗冻饮，店员送上饮品时，想将一支饮管放落枱，饭脚同店员讲走饮管，店员回赠甜美笑容加句多谢，我哋即时心花放喔。