影片
更多
2014-12-30
4239 浏览
尋晚（2014年12月21日，星期日）一行18人去咗旺角新世紀廣場間小南國食冬至飯。室內環境唔錯，無諗過之後落嚟嘅待遇會咁差。首先，張枱淨係放咗3張餐牌，全部都係套餐。唔緊要，我哋問個waitress（操口音）不下兩次可唔可以俾本正常餐牌嚟睇吓（因18人，就算叫套餐，都要另外加餸）。點知個waitress阿姨嘅回覆係「節日淨係得套餐揀，要加餸嘅話，都喺晒個套餐餐牌入面㗎啦。」請問呢啲係咩質素嘅服務態度？！最後個waitress阿姨都係無俾到個正常餐牌我哋。算！我哋最後叫咗2份8人餐。好老實講，食物質素係唔差嘅。套餐有醉雞、香酥鴨、清炒蝦仁、糖醋排骨、涼拌茄子、生煎飽、雲吞雞湯、香煎小黃魚，等等。醉雞 – 醃製時間足夠，好入味。香酥鴨 – 外層鬆軟，鴨嘅肉質嫩滑，只係略嫌肉唔夠熱。清炒蝦仁 – 無乜特別。糖醋排骨 – 無乜特別。涼拌茄子 – 無乜特別。生煎飽 – 飽面夠熱及香脆，餡料及肉汁充足。雲吞雞湯 – 雲吞皮夠薄，餡料充足，雞湯都夠濃味。香煎小黃魚 – 炸得夠鬆脆但偏喊，整體嚟講係佐飯不錯嘅選擇。用餐其間，我個表妹去咗同waitress阿姨講，麻煩佢可唔可以幫忙跟進吓出菜嘅速度，因
首先，張枱淨係放咗3張餐牌，全部都係套餐。唔緊要，我哋問個waitress（操口音）不下兩次可唔可以俾本正常餐牌嚟睇吓（因18人，就算叫套餐，都要另外加餸）。點知個waitress阿姨嘅回覆係「節日淨係得套餐揀，要加餸嘅話，都喺晒個套餐餐牌入面㗎啦。」請問呢啲係咩質素嘅服務態度？！最後個waitress阿姨都係無俾到個正常餐牌我哋。
算！我哋最後叫咗2份8人餐。好老實講，食物質素係唔差嘅。套餐有醉雞、香酥鴨、清炒蝦仁、糖醋排骨、涼拌茄子、生煎飽、雲吞雞湯、香煎小黃魚，等等。
醉雞 – 醃製時間足夠，好入味。[值得推介]
香酥鴨 – 外層鬆軟，鴨嘅肉質嫩滑，只係略嫌肉唔夠熱。
清炒蝦仁 – 無乜特別。
糖醋排骨 – 無乜特別。
涼拌茄子 – 無乜特別。
生煎飽 – 飽面夠熱及香脆，餡料及肉汁充足。[值得推介]
雲吞雞湯 – 雲吞皮夠薄，餡料充足，雞湯都夠濃味。
香煎小黃魚 – 炸得夠鬆脆但偏喊，整體嚟講係佐飯不錯嘅選擇。
用餐其間，我個表妹去咗同waitress阿姨講，麻煩佢可唔可以幫忙跟進吓出菜嘅速度，因出菜比較慢，我哋有老人家唔係好餓得。其實大時大節，多枱數同埋忙係可以明白及理解嘅，但係點解你要回覆我哋「節日係咁㗎啦，你等下啦。」好嘢！邊Q個俾你pass到個training㗎？！
我哋都算啦！最後上咗甜品，但都仲有碟炒菜未嚟。我哋同另一位上菜姐姐查詢一下，點知呢個時候個waitress阿姨又走入嚟質問我哋：「碟炒菜未嚟咩？！」點呀？我要呃都唔呃你碟菜啦吓話？！你有無諗清楚先講嘢㗎？！我哋一家異口同聲咁答：「未呀！」之後佢哋先嗱嗱臨補番碟菜俾我哋。
無幾耐之後，呢位waitress阿姨約7:30走入嚟叫我哋埋咗張單先，話8點有第2輪，我哋要7:45撤退。首先，訂枱時係話8點還枱嘅。你要做多輪生意係明白嘅，但有無需要用咁嘅態度去趕客呢？我哋問可唔可以俾個餐牌睇吓有咩甜品可以叫（因套餐個甜品實在不敢恭維）。呢位waitress阿姨淨係口頭講話今晚嘅甜品得酒釀丸子同埋唔記得另外一款咩甜品（去到呢一刻都無心情聽落去）。我哋對兩款都無乜興趣，就話唔洗喇。佢即刻就話「唔叫咁唔該埋咗張單先呀，7:45交枱。」呢個時候連我阿媽都發火，話：「係咪飲埋杯茶先走都唔得呀？」呢位waitress阿姨仲夠薑答：「得，7:45交檯就得㗎啦。」我哋完全無語，同一個唔同層次及境界嘅人真係溝通唔到。
攞單俾錢嘅時候，我哋叫呢位waitress阿姨攞埋個蛋糕出嚟俾我哋。佢喺呢個時候同我哋講：「喺到切餅要收切餅費$50。」由於佢由入座後嘅態度及處事方式一路都唔係好得，到咗呢個時候我啲親戚都開始燥底，話：「我啱啱嚟到餐廳嘅時候，俾個蛋糕你嘅同事，無人同我哋講過要收切餅費！你宜家嚟同我哋講話要收切餅費？！」佢夠薑喺呢個時候攞本我哋問咗好多次都無見過嘅餐牌出嚟話上面有寫到要收切餅費。真係好嘢！好嘢！你當初肯放本餐牌係枱，就算我自己眼盲睇唔到要收切餅費，都仲叫講得通。嚟到交低餅又冇人同我地講，餐牌又問極都唔肯俾，咁算點先？！最後真係多謝呢位咁奇特嘅waitress阿姨皇恩浩蕩話免收我哋切餅費。宜家唔係我哋俾唔俾嘅問題，我哋每人俾$5出嚟都夠有凸啦。係你哋嘅服務態度同埋呢位同事嘅處事方式極度有問題。
最後我想講嘅係，離開嘅時候（約7:55）大廳仲有大把枱及無乜人等位。
一餐好地地嘅做冬暨生日飯背脊骨落。一間餐廳嘅食物質素有嘅好都無用，被啲零服務質素嘅員工攪到食龍肉都無味。呢間咁嘅餐廳唔列入黑名單都絕對會叫其他親朋戚友唔好幫襯。
张贴