熱點點心專門店

营业中

休息中

星期六返半日，久违地两公婆叹吓茶，拣咗太子地铁站旁边嘅呢间点心专门店。食物选择唔少，基本上茶楼有嘅点心呢度都有，点心纸上嘅食物分类亦清晰易明。难得点心店都有炖汤饮，当然唔可以放过，虫草花炖鸡汤真材实料，汤渣非常多，入口味道鲜甜，感觉滋润。鲜虾肠粉加入韭黄令味道更清新，虾仁大大粒，鲜味突出。虾饺皇大大粒，皮薄馅靓，味道非常鲜美，烟韧嘅饺皮包住弹牙嘅虾肉，冇得弹！鲜虾菜苗饺亦系我嘅最爱，鲜甜弹牙嘅虾仁加上鲜嫩嘅菜苗，比起虾饺多一份清新。咬开透薄嘅饺皮可以见到原粒虾仁，真材实料。北菇棉花鸡亦非常出色，猪皮好入味，底部嘅面筋亦吸收哂汤汁嘅精华。牛肉球大件夹抵食，牛肉、葱同芫荽嘅比例啱啱好，入口亦唔会好重粉感。紫薯包口感松软，紫薯馅清甜软滑，味道唔会过甜，唔会太滞。除咗一般茶楼可以点嘅茶之外，呢度仲提供玄米茶呢个比较少见嘅选择，茶味清新，味道淡而且唔苦涩，解腻消滞一流。近年饮茶都比较倾向呢啲新式嘅点心专门店，贪佢更加抵食，平日仲免加一，点心同样即叫即蒸，质素唔错，而且虾饺烧卖之类仲可以逐件叫，最啱二人世界。见到隔离枱点咗八宝笼仔饭，香气四溢，非常吸引，下次一定要试吓！