餃掂手工餃子雲吞專門店 (已結業)

放假专登跟朋友嚟食呢间饺掂，一出太子站行3分钟就到，真系几方便。见到佢lunch time入面坐满晒人，就知道佢啲嘢食一定好有水准。我地嗌咗佢嘅招牌菜，至尊松茸猪肉饺跟状元九鼎汤，啲饺子卖相非常好，一咬落去就食到好新鲜嘅猪肉，啲肉汁咇晒出嚟，仲有好香嘅松茸味。佢嘅状元九鼎汤饮得出真系落足料，有好重嘅粉葛味，一啲都唔油，感觉好健康。另外我哋嗌咗佢嘅龙凤松茸煎双饺。一摆上枱就闻到好香嘅松露味，煎到热辣辣、脆卜卜嘅饺子一样好多肉汁，黑松露同白松露嘅味都好出，真系食到停唔到口。黄金原味皮蛋个卖相都好吸引，皮蛋好通透，摆入口唔会有好重好重嘅皮蛋味，反而越食越香，个人认为就算平时唔钟意食皮蛋，都一定要试吓呢个黄金原味皮蛋。上汤松茸时蔬都好有惊喜，啲菜好新鲜，配埋好香嘅杞子松茸上汤，真系好正。嘢饮方面，我哋要咗佢嘅自家制山楂雪梨水，因为有山楂，所以饮落酸酸甜甜咁，非常之开胃同埋解渴。一边饮雪梨水，一边食至尊饺子，真系好叹啊。