梅之味 (麗都大廈) (已結業)

今日喺湾仔放工又落大雨，咁就顺便去湾仔食饭啦。平时成日都经过呢条街，不过好少入去食，今日终于可以试吓啦。首先叫咗个前菜，呢个豆腐系冷盘嚟，食落好开胃同埋感觉好可以送饭。睇Menu嘅时候竟然见到有酸菜鱼，咁就一定要叫啦。一上枱估唔到可以咁大碗，本身以为系啲芽菜所以好似好大咁，食落先发现佢嘅鱼片都真系好多，而且仲要无骨啖啖肉，越食越开胃。佢嘅汤底都好正，酸味啱啱好，有少少辣，小朋友都食得。呢个盐酥鸡都好值得一赞，睇个样以为普普通通，咬落先知佢真系好酥。而且入面嘅鸡非常嫩滑，外脆内嫩真系好正呀。食台湾嘢最紧要梗系饮珍珠奶茶啦，估唔到佢仲好饮过平时啲奶茶店。佢嘅奶味好够，而且唔会太甜，珍珠甜甜地，好饮过啲连锁奶茶舖啊。