聯興茶餐廳

营业中

休息中

喺附近住咗十几年到今晚先第一次帮衬佢，本来想食羊腩煲，但担心中伏一濑嘢就跌几旧水都系试吓佢哋啲小菜先。两大一细点咗三个小菜，面酱鸡煲，茄子斑腩，生炒骨，每款$68-70，跟白饭同中汤。（个汤系青红萝卜煲猪骨，唔觉有味精味，掂，例汤嚟讲已经系交足功课。）头𠮶两样𩠌都系中上水准，肯定肯定比果啲连锁店例如道腥，绵仙好食，大加落大块壳就更加唔使讲。今晚亮点系碟生炒骨，大大碟成坐山咁高端上枱，大家自己睇相，大大旧而且系肉厚，咬落去软熟有肉汁，而家坊间好多都系骨肉比例系3:1 而我呢碟系1:2。 粉薄而脆而又仲系黐住旧肉，有啲食肆做到成粒胀卜卜，层脆浆炸到有啲离肉我个人觉得有啲离题唔正宗。味道方面甜酸适中，个汁唔会太稠，菠萝同三色椒又够多。谂起有啲舖搞花神将啲生炒骨放落啲冰度，又话收你两旧水……另外，呢间铺啲招呼好亲切，伙记同事头婆又有礼貌，初头行入去有啲麻甩嘅感觉，估佢唔到又几斯文，问佢要三杯水仲问我要热定暖添。短期内一定会再去，试佢嘅羊腩煲！I love 小店。