紅橋 (已結業)

今日去到旺角，两点几先至揾嘢食，咁就行到旺角天桥下面有一间红桥餐厅，见入面应该都几舒服咁就同朋友一齐入去食迟来的晏啦，坐落原来都系用手机落单嘅，咁就好快噤点咗两个午餐同埋一些小食加饮品，朋友就点咗个忌廉浓汤稻庭乌冬配蒜香蜜糖猪扒加牛角包，再加20蚊嘅烟三文鱼蜜桃沙律，西汤；我就点咗墨鱼汁海虾烩意大利饭，西汤，加18蚊点咗芝麻虾多士，再加22蚊点咗蜜椒单骨鸡翼，重有两杯热柠蜜送！啲餐嚟晒嘅时候，真系两张枱都摆到满晒。首先个西汤系忌廉蘑菇汤，饮落都好creamy，唔错！至于个墨鱼汁海虾烩意大利饭，啲海虾超爽口，每粒饭都索满墨鱼汁，如果啲墨鱼汁浓味一啲，就真系完美啦！芝麻虾多士跟炼奶，食落爽脆，虾胶淋滑，值得推介；而那个蜜椒单骨鸡翼，都外脆内软，仲有肉汁，做得很好！至于烟三文鱼蜜桃沙律都算新鲜，如果多几片烟三文鱼就更好！忌廉浓汤乌冬嘅乌冬爽滑弹牙，十分之合我口味，值得一赞！蒜香蜜糖猪扒，睇落干咗啲，但食落都算淋滑，仲有少少脆面！个牛角包就中规中矩！全部埋单，二百蚊有找，真系超抵食！餐厅坐落舒服，冷气好够，服务亦相当之好，值得一试再试。