安南小館 (形點) (已結業)

最近家姐搬咗去元朗住，所以成日同佢去 Yoho Mall 行街，两个人揾嘢食，见到门口张 poster 有晚市套餐，两个人先至$398，有好多个𩠌，入到去坐低准备落单，个侍应话今晚D桂花鱼大大条好好肉，问我地试唔试下另一个二人餐，有炭烧猪颈肉沙律、椒盐大头虾、明炉香茅青柠桂花鱼、越式咖喱肉松炒饭、杂菌炒西兰花、甜品仲有得拣椰汁粟米糯米或椰青果冻，但比另一个香葱鸡套餐贵$100（二人共$498），谂谂下都想食椒盐大头虾，就试下呢个$498二人套餐。好快就黎咗个猪颈肉沙律，猪颈肉烧得几香，好爽口。再黎椒盐大头虾，最初以为二人餐应该有两只大头虾，点知原来有四大只，食完都饱咗一半，好惹味，正！再黎条鱼，又系好大条，厚肉得黎又好滑㖞，个汁酸酸地，香茅味好出，可以当汤饮。杂菌炒西兰花无乜特别，中规中矩。跟住碟炒饭又系大大碟，我地已经饱到食唔落，所以打包拎走留返第二日食。就算几饱都要食甜品，本来想食椰青果冻的，但果冻已经售罄，我又唔想食糯米咁饱，个女经理好好人，帮我转咗做芒果 pancake，上面仲有一球椰子雪糕，好香浓椰子味，仲食到有小小椰丝，真材实料，好开心。呢个套餐真系超抵食，三个人食都一定够