餃撚店 (已結業)

發現到係土瓜灣有一間特色手工餃子店，佢哋啲餃子、小籠包口味係出面都冇見過，今日特登過嚟試吓有幾特別。餐廳係條巷仔度，一連三個舖位。都幾光猛乾淨。小籠包、餃子除咗基本口味之外，仲有好多特別口味，小籠包就試咗花雕醉雞汁小籠包，真係有好濃嘅酒香味，每一個都係食緊一大啖醉雞咁，如果要渣車嚟食真係要三思。煎餃就試吓咗雙重芝士粟米煙肉餃同埋椰香荔芋臘腸香菇餃。前者芝士爆漿而出，咸咸香香咁似食緊西餐。後者直頭將臘味芋頭煲塞咗入去個餃子度，啱曬冬天食。另外主食叫咗個椰菜雲耳香菇豬肉餃湯麵，加咗$10轉成老火蕃茄薯仔紅蘿蔔排骨湯，個湯真係好好飲。仲有唔好錯過佢哋個小心爆汁牛肉煎餅，咬開一啖啲汁把把聲係咁流出嚟，一人一個熱辣辣真係必試。