蛇王兄 (已搬遷) 新店位置

听晚系今季镖赛最后一场，今晚谂住食完饭就返屋企休息。谂左好耐，决定去食蛇油鸡饭，赛前食蛇补补去。一坐底即刻叫个蛇油鸡套餐先，有龟汤送埋只系五十几炆，但居然鸡已沽清 ﹗搞错呀 ﹗黎左 3 次都食唔到 ﹗上两次无开门，今次就卖鬼晒 ﹗黑仔呀 ﹗坐低左又费事去第度食啦，局住食劲肥腻既糯米饭 ﹗唉。细蛇羮餐连蛇汤同糯米饭，八十几蚊好贵啊 ﹗蛇汤，我其实一心想饮龟汤架，睇错左，原来龟汤系并鸡饭，顶 ﹗今次第二次饮蛇王兄既蛇汤，上次真系麻麻地，川贝味太浓，味道太浊。不过今次好味好多㖞，味度 balance 好多，仲有龙眼肉既清甜，而药材味又刚刚好，味道次次唔同咁搞笑架。细蛇羮，点解今日既蛇羮同蛇汤都比上次好食咁多架？汤底浓郁香甜，足料又厚薄适中，上两次都劲杰挞挞啰。加埋醋同胡椒粉，好开胃呢。双肠糯米饭，无腊味、无虾米，只有劲多肥猪肉同豉油捞既糯米饭。只靠肥猪肉既猪油香味非常单调，食落叫做够味啰。润肠同腊肠都超级肥，成口都系油，润唇膏都悭返 ﹗今日又无鸡饭食，局住食依个超标糯米饭啰 ﹗