岩鹽日本料理 (利舞臺廣場) (已結業)

铜锣湾有好多好嘢食，今次就试咗呢间系利舞台嘅岩盐日本料理。店员嘅服务态度非常好，好有耐性咁解释推介食品同埋优惠，座位都好舒适，岩哂weekend黎叹下好嘢。我地嗌咗个九州鱼生丼，个卖相超靓，有八、九款刺身系饭上面，有甜虾、吞拿鱼、三文鱼、油甘鱼等，仲有海胆同三文鱼子，全部都好厚身同好新鲜，真系超级正。另外我地仲嗌咗个火炙寿司配牛肉乌冬定食。牛肉乌冬嘅汤底好好饮，牛肉味几浓。寿司有八件，全部都好靓，一啲都唔马虎，仲有香港好少见嘅炙烧左口鱼，充满鱼油，好好食。两个套餐都有面豉汤、沙律、同埋渍物，好丰富。最正嘅系佢而家做紧优惠，晚市嗌任何食物都可以半价叫松叶蟹三文鱼子海胆丼或者海胆生蚝。我地就嗌咗海胆生蚝，六只生蚝只系$98 ，虽然唔算好大只，但系好新鲜，配埋上面嘅海胆同三文鱼子，真系好抵食。希望下次可以试吓其他嘢食啦。