新泰東南亞餐廳

营业中

休息中

比卡妈妈话要去K11攞嘢，唔揸车坐火车一阵就到，出咗商场行过对面，比卡猪见到门口有架“笃笃”咁得意，系咁叫要坐，咁咪入去坐吓影吓相，知客姐姐仲好好相与，原来呢间系食东南亚菜式，横掂都要食晚饭，于是行落去试试，原来下面别有洞天，地方算大，员工又好热情，睇餐牌款式都好多!泰国青芒果沙律，两个字形容“清新”，又唔会太辣，建议大家第一味就食，食完开胃；香芒软壳蟹米纸卷，系我喺香港食过米纸卷最好食嘅，最怕食软壳蟹食到“油亿”味，所以呢度绝对唔系用万年油；马拉肉骨茶，两公婆点个细嘅，原来都唔细，两公婆刚刚好，饮落有淡淡药材味飘出嚟，唔钟意太重药材味嘅朋友啱哂，而且排骨够淋，不俗!泰式炒椰菜仔，唔多地方有得食椰菜仔，我老婆好钟意食，连比卡猪都食，可能觉得似一个个波波咁；菠萝炒饭，又系小朋友至爱，但下次我会试泰式烧春鸡酿香茅黄饭，好吸引我眼球，仲有个面包焗咖哩软壳蟹，我见有几枱都有叫，应该系熟客，包稳阵；菠萝沙冰有惊喜，唔会得个甜字，好新鲜!埋单同经理倾咗两句，原来呢度有几间房，价钱唔贵，好适合大班朋友私人饭局；经理仲话下午茶照餐牌仲有8折，咁抵下次嚟开尖沙咀真系要过嚟食!