羲和小館 (已結業)

突然间想食中菜，所以今次就试咗位于东涌嘅羲和小馆。铺面都算几大，座位全部都几阔落。比起普通中式嘅餐厅，羲和小馆行一个比较现代化啲嘅风格，但仍然不乏中式情调，环境令人几舒服。食物方面，当然嗌咗呢度嘅招牌菜片皮鸭。师傅会喺现场喺成只鸭即刻切肉，然后由店员上菜，望住即场制作嘅烤鸭肉，令依味菜式生色不少。 佢有三款唔同嘅鸭肉部位，配搭唔同嘅推荐食法。有传统配甜酱，同埋大葱、青瓜一齐食，亦都有配爆炸糖新鲜食法。唔识嘅话佢有张卡仔教你点配搭，当然亦都可以因应自己口味配搭唔同食法，真系虽然一道菜式但有多重享受，真系食得几好玩！另外都嗌咗个樱花虾海味蒸饭都比想像中好食。个蒸饭嘅饭煮得相当入味，每一啖都充满住海味嘅鲜味，而且又唔会好似炒饭咁油腻，饭亦都保持到嚼劲、湿润，可以话令我感到相当惊艳。海味本身亦都几足料。最后嗌咗嘅香辣虾都相当唔错，钟意食香口/辣嘅朋友应该会几钟意呢款菜式。总结下，羲和小馆价钱嚟讲唔算平，但食物同环境质素绝对值得呢个价钱，可以话系我近年来食过最值得再去嘅中菜餐厅之一。如果想食中菜，比起饮茶大家不妨嚟试吓佢。