SuperNormal (淘大商場2期)

营业中

休息中

探完朋友同bb喺附近食埋晚饭，上网揾到呢间评价极好嘅餐厅，隐藏系淘大商场对出嘅角落，位置唔太显眼，行近就见到转角有大大个霓虹灯logo，非常容易辨认。手打鲜蚝汤鲜味浓郁，蚝味突出之余仲有好香嘅菇茸作为余韵，口感顺滑，每一啖都系享受，好有惊喜！黑松露薯条几乎系我哋每次食西餐必点，松露落得好大方，香味浓郁，混入少许芝士，极度邪恶。食厌咗牛肉汉堡，今晚特意点咗炸鱼汉堡，鱼柳大大件，即叫即炸，入口外脆内嫩，配上健康嘅牛油果、蕃茄、生菜同清新嘅他他酱汁，系完美嘅配搭！牛肝菌意大利饭水准亦好高，米粒熟而不烂，带些少咬口，浓稠嘅酱汁带嚟黏稠顺滑嘅口感，混入露笋令成个risotto更加清新，减低腻滞感。香煎鹅肝两面煎成金黄色，香气四溢，入口系满满嘅邪恶滋味，令人齿颊留香。酷爱mojito嘅先生点咗一杯无酒精嘅薄荷青柠梳打，加入青瓜感觉格外清新。今晚点嘅每一道食物都令人非常满意，特别系手打鲜蚝汤，令人印象特别深刻，餐厅食物水准极高，而且价钱合理，难怪一直好评如潮。