Cova Ristorante & Caffe (太古廣場) (已結業)

一开番晚市，梗系要揾啲好嘢食吓！金钟cova一向帮衬开，午餐、下午茶都成日帮衬，今次试咗个二人份斧头扒晚餐，要写个食评支持一下！本身晚餐喺疫情之前系有丰富自助头盆任你食，而家转左头盆碟上，食完就可以叫侍应添，而添食仲可以选择只添自己喜欢食𠮶一两样都得！食完头盆，就有非常高水准嘅汤，今次系磨菇汤，味浓有菇粒，又香又滑，配埋面包，根本冇得输！主菜嚟喇，二人份斧头扒！叫左三成熟，配以薯条、菠菜叶、松露粟米蓉，仲有海盐&香浓牛扒汁，主菜一上枱，已经成为成间餐厅嘅焦点，其实枱嘅食客都投以艳羡目光，卖相都已经非常吸引！牛肉味香浓，肉质鲜嫩又多汁，质素毋庸置疑相当高！两个人食非常满足，细食嘅朋友肯定要打包！最后仲有甜品及餐茶，成餐都十分之满意！大满足！价钱方面，本身晚饭每位$388，而斧头扒主菜需要加$388，所以两个人埋单$388x3，另外我甜品加咗$38食cova最出名嘅靓cake，$1300左右埋单，不过埋单佢又送现金卷，睇嚟好快又去食多次！