牧羊少年咖啡館 (香港單車館)

营业中

休息中

之前嚟过香港单车馆嘅牧羊少年咖啡馆，座位好阔落，而且环境好舒服，好彩早年结业之后而家重开，又多个聚餐落脚嘅地方。二人餐好抵食，可以自选前菜、意粉、主菜、饮品，最后仲有Häagen-Dazs雪糕添！前菜方面拣咗炙烧荷兰汁猪肉排，份量非常之多，就好似主食咁多，肉质一啲都唔柴，肥瘦平均。意粉方面拣咗避风塘炒蟹肉意大利粉，味道方面有少少辣辣地，有晒避风塘嘅惹味，加埋蟹肉，成个配搭好夹，十分推介！主食方面拣咗咖啡羊架 伴露丝玛利烧汁，羊架有三旧，唔会烧得好干，羊脂充斥喺个口腔度，配菜有烧芦笋同埋烧日本南瓜，材料新鲜得来又可以解腻。饮品方面，牛奶可可朱古力非常浓郁，有杰杰地嘅口感；旭日就系红萝卜、香橙同埋苹果鲜制而成嘅果汁，一啲都唔会太甜，确实系健康之选。最后食埋曲奇味嘅Haagen-Dazs 雪糕就为今餐做完美嘅作结。