無辣不歡 (已結業)

假日工人姐姐放假，父母拍拖一早出佐门， 大家姐闭关绘图赶deadline，所以主要系我同二家姐一齐食午餐，于是我呢个做细嘅就要搭车落葵芳外卖食物返嚟比佢哋食。因为二家姐钟意食麻麻辣辣𠮶啲香口食物，所以我就行咗嚟无辣不欢买啲外卖返去食。以前都嚟呢间无辣不欢食过都几好味，最重要就系二家姐钟意食，当然我都钟意食啦。麻辣土豆丝，其实叫薯仔丝仲好过啦，呢度系香港，做乜嘢叫土豆呢，不过点都好啦，啲薯仔丝好淋，淋得嚟又好爽口，味道好麻辣，越食越滋味。麻辣手撕鸡，手撕鸡就最好因为冇骨啖啖都系肉，手撕鸡唔系好似预期咁麻辣，不过都好入味， 唔系太受得辣嘅大家姐就比较钟意食呢个手撕鸡。麻辣大肠，呢个大肠系猪大肠，系三种食物里面最麻辣嘅，佢嘅麻辣程度，就系辣到由脚板底冲上头顶咁样，真系麻辣得好紧要，我二家姐就食得非常滋味，佢真系无辣不欢，可谓尽得阿爸嘅真传。如果一边吃食麻辣野一边饮汽水会系好正， 不过我一时大意唔记得咗买汽水，搞到成件事都唔同晒。