唯一麵家

营业中

休息中

同朋友行葵广，买到大包小包，想歇歇脚， 不如早啲食晚饭，望咗几间食肆，系唯一面家坐得最松动，就食呢间啦星期六都有下午茶餐不特止，仲到七点，都几多选择，店家又几慷慨㖞我哋点咗酸辣幼面同香茅猪扒幼面，餐饮拣豆浆酸辣幼面 - 汤嘅味道调配得几好，朋友觉得偏酸，但我呢个爱酸之人觉得刚好，而且辣味好出，又唔会煮到太杰；𩠌方面就系常见嘅猪红、豆腐、肉丝、冬菇、荀丝、蛋花，猪红同豆腐切到大大粒，反而更加食到食物嘅原味。虽然面煮得有啲淋，唔够挂汤，但事前应该有过冷河洗走啲粉浆，先能够保持汤嘅清澈，应记一功香茅猪扒幼面 - 猪扒肉质有弹性唔会死死实实，汤底清清地，配雪菜嘅咸味同口感，唔错成个餐份量都唔少，本来谂住食完未必够饱要再去扫街，点知就喂饱咗我哋两个正常食量嘅女仔，最紧要系坐得舒适，价钱经济，医完肚再去血拼！临走见到几枱都食紧馅饼，卖相好吸引，下次再试！