小甜甜 (已結業)

年頭比較清閒，尋晚又與一班舊行家在嘉雀聯誼。收場已經係凌晨四點幾，有人想食野，我就口淡淡的，想食甜品，強記應該收左，又唔想行咁遠，就兩個人行入隔離食野。呢度一向多野食，原本以甜品為主打，後來賣埋粉麵飯，家陣連麻辣火窩都有得賣，幾犀利。唔好以為夜就無人，呢度照舊有電視睇，照舊是好多人的，還有不少是年青人，似乎全部是不用上學或上班的。要了碗綠豆沙及椰汁黑糯米，一熱一冷。綠豆沙起沙，又幾足料，海帶、臭草、陳皮都落足，不太甜，唔錯；椰汁黑糯米幾杰，亦不太甜，冷冷的幾好味，不過糯米幾飽肚，當消夜就差不多。埋單四十蚊有找，唔貴。雖然不是什麼好地方，但夜麻麻要搵食，平平地都唔錯。離開時都就天光了。題外話：唔知咩解究，感覺上而家好多年青人食煙，好似尋晚就是人手一支，成間小甜甜都煙霧迷漫、烏煙瘴氣，如果食肆禁煙可令班後生仔少點吸煙，我想我是應該支持的。