喜越 (已結業)

A姐话近期香港好似多咗好多越南餐厅，计我话只系因为佢之前只钟情日韩菜系姐。唔知大家有无觉得每次食到一碗热辣辣又浓香嘅牛河，其实真系好幸福架！今日我哋去到铜锣湾耀华街食越南菜小店：喜越，一于试试又啱唔啱口味先啦！食越南河，最重要就梗系个汤啦！汤底充满香浓嘅牛肉味，最重要系唔会系死实实嘅味精味，而综合牛河都算足料，有生牛肉、牛丸同牛展。牛丸爽口弹牙，不过因为切咗半，所以无咗爆汁嘅感觉；而牛肉同牛展好软腍，肉味香浓。当法包遇上咖哩汁，令一向干身嘅法包索晒咖哩，真系另一享受！越南咖哩唔辣，仲带有香茅同椰奶嘅香味，鸡肉嫩滑，仲有入晒味嘅薯仔，好满足！芥兰苗份量唔少，够新鲜爽脆，而虾米仔嘅香味，令芥兰苗嘅香味大大提升。淡淡嘅香茅味，配上蜂蜜真系好滋润养喉。同一般嘅菠萝冰唔同，呢度嘅菠萝打到半碎，所以每啖都饮到菠萝肉，好香又唔会太甜。