湄南 (已結業)

将军澳人口增长快，各式食肆都跃跃欲试，进驻各大新商场。POPWALK新开一间越南、马来西亚加泰国料理，中文店名叫湄南，但英文名叫MEKONG(湄公)，唔知系故意表现越南同泰国菜都有吖，定系手民之误？招牌餐牌都用TIFFANY BLUE,内栊光猛，配以鸟笼设计灯饰，及浅木色枱，感觉新派。墙上有三两张渔民农夫扫描作为装饰，可谓聊胜于无，感受唔到半点异国风情。见微知著，对食物有无要求，好容易喺细节上反映。枱面只见两樽调味料。士拉差辣椒酱同辣椒醋，反而唔见有鱼露供应。湄南生牛肉汤河(午餐)$42乐坛有句说话，一人一首主题曲，我话，一国一款招牌菜。一碗牛肉粉就可以知道越南餐厅嘅水准。汤底牛味浓郁，值得一赞！牛河舖上生牛肉，以涫汤渌/浸熟牛肉，配以炸蒜、葱花同薄切洋葱，河粉爽滑，上枱时亦以指天椒同青柠佐食，整体嚟讲尚算合格。美中不足，店方未有提供九层塔，芽菜份量太少，最令我留意嘅系，汤唔够热！令牛肉比较难由生变熟！但以生牛河而论，实属中上之选。