泰越概念 (已結業)

之前去过铜锣湾呢栋新开嘅大厦食日本菜，原来最近开左一间泰越餐厅，今次一于试下东南亚料理。餐厅门口位置嘅雪柜放满水耕菜，用来做沙律想必份外清甜。装修简洁企理，梳化位坐得好舒服。夏日炎炎叫个菠萝沙冰消下暑，以原个菠萝上枱，沙冰入口非常清甜，菠萝果香浓郁！DIY鲜果汁几有新意，我就拣左芒果+青瓜+牛油果乳酪呢个配搭。店员将所有材料放入搅拌器，系客人面前将水果打成果汁，真系够晒fresh。果汁质感比较浓稠，牛油果味做主导，加上青瓜特别清新。柚子沙律铺满鲜虾卖相吸引，沙律混入虾米干、鱼干、花生碎，香口惹味！柚子嘅清甜同酱汁嘅咸香形成对比，系一道好开胃嘅菜式。泰越拼盘包括手打虾饼、越南春卷、扎肉炸虾片、香茅虾糕单骨鸡翼，啱晒样样都想试少少嘅我。虾饼炸至金黄酥脆，口感弹牙，充满鲜香。春卷亦炸得香脆，但皮有点厚，馅料味道可以更丰富。单骨鸡翼肉质嫩滑多汁，咬落啖啖肉，不过香茅同虾糕味道唔突出。扎肉炸虾片面头撒上炸过嘅葱蒜增加食味，垫底嘅虾片放左一阵仍然保持脆口，系小食拼盘中最有惊喜！泰越概念嘅食物款式新颖而且多元化，钟意泰国同越南菜嘅朋友可以一试！