Just Eat (已結業)

呢间位于般咸道附近嘅越式餐厅， 已经开咗一段时间，一直都好想试，今日终于同朋友嚟试。餐厅嘅地理位置并唔难揾，喺西营盘站c出口行只需要三分钟就可以到达，十分方便。 餐厅嘅装修行简约风，餐厅十分干净。睇完menu觉得佢嘅嘢食都好吸引, 每一样都想食, 最后叫咗一个牙车快，一个春卷， 一个浓味牛汤浸牛肉河。 牙车快其实系鸡肉生菜沙律， 佢嘅蔬菜其实几新鲜，作为一个前菜酸酸甜甜其实几开胃。春卷方面仲会配埋生菜同酱汁，可以包住春卷食，食落爽爽脆脆，春卷仲要系现炸，够热又新鲜，馅料亦都好多， 个人觉得小食嚟讲都唔错。至于浓味牛汤浸牛肉河顾名思义就系牛肉汤加肥牛河粉，不得不说，呢个汤河好有诚意，河粉超多超大碗，里面好足料，牛肉亦都有好多，而且煮得刚刚好，唔会好韧。饮品方面，我同朋友分别叫咗一个越式冻柠檬茶同菠萝柚子梳打。 冻柠茶味好香浓 柠檬味同甜度亦都刚刚好， 菠萝柚子梳打就更加好饮， 佢嘅菠萝系煮过嘅，好好食，配埋梳打刚刚好。