德勝小廚 (已結業)

黎到上环既德胜小厨，大约３点几，个阵冇乜人食野，所以一入去就位坐。佢邻近港铁站，行几步就到，地理位置绝对方便食客啦！入到去，发现佢既餐牌都几有特色，全部都系自己写，仲写得几靓！比起其他地区既茶餐厅都几有特色。我同２个朋友嗌左个沙爹牛肉一丁、煎蛋肠仔、多士同奄列。有人话最易整既野最难整得好食，此言非虚，先讲奄列，稍嫌煎得熟左少少，如果唔系就可以再滑Ｄ啦。切开只蛋一睇，原来里面都几足料，好多火腿同叉烧，啖啖肉，唔错唔错。而多士系唔脆既，须知道多士脆唔脆系好重要，所以大扣印象分。个人认为，只太阳蛋个边唔够㶶，所以个边唔够脆。但佢隔离个条肠仔又太㶶，成条非洲黑肠咁，食落都唔开胃啦！沙爹牛肉面就冇乜特别，大家明啦，即食面好难煮得难食，牛肉几腍唔痴牙。