食神麗宮

营业中

休息中

又有朋友就黎移民，今次拣左食中菜，贪佢圆枱方便倾偈，又冇限时可以慢慢倾，听讲食神丽宫系由星爷套<<食神>>嘅饮食顾问坐镇，所以专程过黎试下。茗茶$12/位，花生$12碟，比好多连锁茶楼都平。特酱烧乳鸽($35) - 乳鸽原只上，店家有提供较剪同手套俾食客自己分。乳鸽皮脆肉嫩，唔会太肥，少少咸香几好食。蒜香玉乳脆鳝球($168) - 脆鳝球一客有八件，外层炸皮酥脆，鳝球肉质扎实冇碎骨，食落唔会太油咸咸香香非常惹味。15年陈皮话梅骨($118) - 话梅骨卖相红红地有啲似南乳，但入口话梅酸甜味好突出，炆得够腍，骨肉好易分离。戏棚龙虾汤泡粥($68) - 升级版蚝仔粥，用龙虾代替蚝仔，味道够又唔会太咸，另外仲备有油炸鬼可以加入去，泡粥都几大碗，可以两三个人share食。紫米露 - 埋单仲有糖水送，可以拣腐竹蛋糖水或者紫米露，紫米软硬度适中，椰味香，食完个糖水满足晒。总结，小菜选择唔算太丰富，不过每道菜都好有水准，侍应都比连锁茶楼亲切热情，会同食客吹水讲笑，绝对令成餐饭加左唔少分。