十二味貴陽牛肉粉 (已結業)

同家人喺铜锣湾行完街就周围荡揾好嘢食，荡下荡下畀呢间新开食店个名吸引住，唔知同谢生有无关系嘅呢？呵呵~就系抱住呢份好奇心，一于入去试试啦~餐牌好简单，一目了然，有3大款牛肉粉畀大家拣，分别系招牌清汤牛肉粉、红烧牛肉粉同红油牛肉粉，由于我哋成家人都唔系几食得辣，所以一致决定捧清汤牛肉粉场，一人一碗~等咗几分钟度牛肉粉就上枱喇，斋睇买相都觉得唔错，汤底望落几清，大家齐齐试饮一啖，饮得出系用牛骨熬制而成嘅浓汤，尽收精华，估计应该花咗唔少时间同材料去熬，再嚟齐齐试一啖米粉，粗度介乎平日食开嘅米线同米粉，入口相当爽滑~老豆拣咗配牛肉丁，虽然话系肉丁，但其实一啲都唔「丁」，仲几大粒添~老豆话牛味够浓，咬落弹牙有口感又够腍，佢仲贪得意学人撒咗一勺花溪辣椒落去试试，话成碗面即时更香更惹味~我同阿妈就拣咗牛肉片，夹起嚟睇晶莹剔透，厚薄恰到好处，咬落肉质嫩滑，牛味香浓，连埋米粉同汤一齐入口，滋味double up，真系估唔到清汤都可以做到咁美味~听到隔离枱话，原来连习主席都系贵州牛肉粉嘅忠粉，所以牛肉粉喺内地系超级火红，估唔到我哋一家咁就无意中食咗「国家级美食」！