上海弄堂菜肉餛飩 (綿發街)

营业中

休息中

今日去咗跑马地，见天气冻冻地就想食啲热辣辣嘅中式嘢，所以就去咗上海弄堂。每位食客都会有一杯大麦茶，比普通中式茶多一阵香味。最近天气转变，感觉好干燥，所以叫咗姬松茸猪展汤滋润一下，炖汤好滋润好补，饮完成个人即刻暖哂。我叫咗红烧肉百页结一人套餐，配脆皮春卷，春卷啱啱炸起，热辣辣好脆口，而且用咗比较健康嘅蔬菜馅。红烧肉百页结嘅红烧肉煮到好腍好入味，肥瘦适中，唔干得嚟又唔会太多肥膏。之前未食过百页结，质地有啲似腐皮。加钱转咗个担担面，上海弄堂嘅担担面不嬲都好高质，少少辣好惹味，面又够弹牙，仲有好香嘅花生酱味。朋友就叫咗比较健康嘅嫩鸡煨面，有好多菜粒同鸡粒，鸡肉都够嫩唔会干。最后仲叫咗个小笼包，一上菜热辣辣，蒸气令到小笼包胀卜卜，皮够薄，猪肉好肉地，肉汁同浓汤完美混合。