翠屏茶餐廳

营业中

休息中

睇返记录，原来嚟呢间舖头食嘢，只不过系约一个月前嘅事，当时三𩠌车仔面配热饮系$39，但今次嚟已经加咗$1，去到$40啦！记得上次话佢哋有檬粉同银针粉可供选择，但实情系点？呢日嚟到，话要檬粉，个店员话睇吓先，先帮我写住银针粉，结果嚟到真系银针粉，而唔系檬粉，不过都ok，车仔面配银针粉其实都好少见，所以唔系咩大问题。三𩠌我就拣咗大肠、牛筋，同埋猪皮，呢三样比较浓味嘅食物，再配一杯热奶茶。大肠系正路嘅雪货，腍身得嚟少咗啲烟韧，更无鲜货嘅香味，话时话，依家起出面食猪大肠，都几难食到鲜货。牛筋又系一定系雪货，腍得嚟带啲爽口，而且够入味，唔错。猪皮都叫有啲厚度而且爽口，而唔系薄薄嘅油炸猪皮，𠮶只我买过一次，永远唔会买第二次。奶茶同银针粉就正正常常，无咩特别。总括嚟讲，呢餐算系普普通通，胜在试下银针粉配车仔面会唔会有啲火花出嚟，答案显而易见系无。